Mi ta skirbí e artíkulo aki den ingles pero NAAM na Korsou a haci un tradukshon den Papiamentu.
NOS HERENSIA NASHONAL: UN ‘JOINT VENTURE’
Tanny and the Boys, St. Maarten
Tanny and the Boys ta un ‘string-band’ (‘un banda di muzik di kuèrdè’) konsistiendo di seis miembro i mashá konosí na St. Maarten. E miembronan ta: George Violenus, gerente i tokadó di tambora, Jocelyn Arndell, tokadó di raspu; Federico ‘Culebra’ Nathaniel Smith, tokadó di ‘ukulele banjo’ i kantante; Maxime Emeal Reed, guitarista i kantante mayó, Edward Violenus, akordeonista; i James Roosevelt Samuel, tokadó di marimba. E rumannan Violenus a nase na Aruba di mayornan prosedente di St. Maarten; Culebra a nase na República Dominicana, tambe di mayornan di St. Maarten; Maxime ta di Anguilla; James di St. Maarten; i Jocelyn di Kòrsou. Pa loke ta algun di e instrumèntnan ménos konosí por bisa ku un tokadó ta pone e tambora riba su skochi i tok’é ku palu. Ta un instrumènt fast den tokamentu di merengue dominikano. E instrumènt ‘ukelele banjo’ ta un vershon mas chikitu di e konosido ‘banjo’, pero kontrario na ‘banjo’, no ta toka e notanan individual ku ‘pik’, sino mas bien ta raska e kuèrdènan pa e kompañá e instrumènt prinsipal ku ta toka e melodia. Marimba di Caribe ta diferente for di marimbanan manera e ‘xylophone’ típiko di Sentro- i Suramérika. Esun di Caribe ta original di e ‘kalimba’ afrikano o sea ‘piano di dùim’, esta un seri di lenga di metal montá riba un kaha di resonansia di palu ku bo ta toka segun bo ta pik e lenganan ku dede. E vershon karibense ta sirbi di baho i ta konosí na Kòrsou i na otro partinan di nos region komo ‘marímbula’. Akordeon ta duna un toke distintivo na e muzik di Tanny and the Boys. Ta us’é tambe na otro partinan di Caribe manera na República Dominicana, Puerto Rico, Belize, Dominica, Aruba i Kòrsou, pero e akordeon akí toká den e formashon di instrumèntnan di kuèrdè di Caribe ingles huntu ku perkushon afro-latino, ta un estilo úniko di St. Maarten. E entrevista i e seshon di grabashon a tuma lugá na mart di 2003 na kas di e guitarista i trahadó di marimba Carlson Velasquez. Carlson su kas ta nèt dilanti di e frontera na parti franses di e isla, na un di e poko lugánan ku a keda kunuku ainda. E lugá preferí pa sinta toka muzik na kas di Carlson ta den sombra di un palu di mango, asina ta ku e seis músikonan a bai sinta ei pa toka. Artíkulonan ku a sali kaba tokante Tanny and the Boys a dediká nan prinsipalmente na e músikonan i nan background, p’esei ami a puntra e grupo tokante orígen i ritmo di e kantikanan ku nan a lansa den nan dos álbumnan: Fête (1992) i Classic Tanny and the Boys (2000). Loke mi a haña sa ta ku e diversidat di nan konosementu musikal ta realmente fenomenal; ta konsekuensia di e orígennan diverso di miembronan di e grupo. Resumiendo, nan repertorio ta inkluí kalipso di Caribe ingles, wals, polka i ‘schottisch’ (schottisch ta parse polka pero e ta mas slow); ‘American country western’ i ‘blues’; merengue dominikano; bolero spañó karibense; kumbia kolombiano; ‘beguine’ di Caribe franses, i tumba di Kòrsou. Nan ta toka tur e formanan ei formidablemente, i nan tin ademas e habilidat di kambia ritmo di e kantikanan na nan antoho. Por ehèmpel, e kantika ‘Fever’ ta un kalipso bieu di St. Maarten ku e banda ta toka den ritmo di merengue. ‘Come Go to Bed’ ta un komposishon original di Eddie Violenus den un kombinashon di wals i ritmo di ‘schottisch’. ‘Lanta Mainta’ ta e tumba ku George ta kanta na papiamentu. Fanátikonan di Jim Reeves su ‘country music’ lo rekonosé e kantika ‘He’ll Have to Go’ maske e ta registrá riba e CD Classic Tanny and the Boys komo ‘Your Sweet Lips.’ E grupo ta toka tambe ‘When I Grow Too Old to Dream,’ originalmente kantá pa e aktor di sine Nelson Eddy! Tanny and the Boys ta splika ku influensia di e migrashon Karibense ta yuda di krea di vários fuente i di forma eksitante den desaroyo di muzik popular propio. Por ehèmpel, tempu tabatin skarsedat di trabou na St. Maarten den e promé parti di siglo 20, hopi habitante di e isla ei a migra pa República Dominicana òf Aruba òf Kòrsou pa bai traha. Miéntras nan tabata apsorbé e herensia kultural di e islanan ei, nan a keda semper tòg konsiente di nan orígen sanmarteño. Nan ku nan desendientenan hopi biaha a bolbe nan isla di orígen ora situashon ekonómiko a kuminsá drecha, prinsipalmente durante e ‘boom’ turístiko ku a kuminsá na añanan 1960 i a sigui te dia djawe. Esaki sigur ta e kaso ku e rumannan Violenus i Culebra. Ta notabel tambe, ku St. Maarten ta parse úniko den tur e islanan bisiña pa loke ta e diversidat spesífiko akí Ora bo biaha ku ferry for di St. Maarten franses, baha na Anguilla, bo ta sinti e ambiente kambia den unu predominantemente anglo- karibense, i meskos ta konta tambe pa e islanan antiano Saba i Statia.Lamentablemente, no a studia e diversidat akí basta manera a hasi na e otro islanan di Caribe; por ehèmpel, a studia ekstensivamente e isla chikitu Carriacou, parti di e nashon Grenada, pa motibu di e influensia afrikano den su muzik. Sin embargo, den fuentenan koriente disponibel na Estádos Unídos di Merka, no tin kasi nada skibí di muzik di St. Maarten, Saba i Statia. Nos ta spera ku e artíkulo akí lo ta un paso humilde padilanti pa koregí e desekilibrio na Merka. Fuente: Esposito, Michael. Interview with Tanny and the Boys, Belle Plaine, St. Martin, March 30, 2003. Sekou, Lasana, ed. Fête – Celebrating the Traditional Festive Music of St. Martin. St. Martin: House of Nehesi Publishers, 1992. Sekou, Lasana. Liner notes to Tanny and the Boys LP Fête and CD Classic Tanny and the Boys. Sheehy, Daniel E., ‘Netherlands Antilles and Aruba.’ In Olsen, Dale A. and Sheehy, Daniel E., eds., The Garland Encyclopedia of World Music, Volume 2: South America, Mexico, Central America, and the Caribbean. New York: Garland Publishing, 1998, 927-931.
Copyright 2012 by Michael Esposito. All rights reserved. Todos los derechos reservados. E-mail: meesposito@gmail.com This site updated October 9, 2011/Este sitio fue ampliado el 28 de abril de 2012 Santa Fe Travel: a division of L & M Travel - Michael Esposito: IC Travel Specialist of L & M Travel - CST# 2043262-40 L & M Travel IC Agent
